Eph 3 | BOJ | STEP | Qotei na niŋgi kumbra tulaŋ boledamu eŋgej anjam di e marsim laqnem deqa jeu tamo naŋgi na e ojsib tonto talq endia ateb unum. E Pol. E na niŋgi sawa bei bei qaji tamo niŋgi aqaryaiŋgwa osim deqa Kristus Yesus aqa wau di ojeqnum. Utru deqa e tonto talq endi unum.

Ephesians 3

Pol a sawa bei bei qaji naŋgi Kristus aqa anjam bole minjroqnsiq laqnu

1 Qotei na niŋgi kumbra tulaŋ boledamu eŋgej anjam di e marsim laqnem deqa jeu tamo naŋgi na e ojsib tonto talq endia ateb unum. E Pol. E na niŋgi sawa bei bei qaji tamo niŋgi aqaryaiŋgwa osim deqa Kristus Yesus aqa wau di ojeqnum. Utru deqa e tonto talq endi unum. 2 E are qalonum, niŋgi endegsib queb, Qotei a niŋgi qa are tulaŋ boleiyeqnu anjam di e na merŋgwajqa deqa osiq a e qa dego are boleiyosiq wau ebej. 3 Qotei aqa anjam di nami ulitesoqnej. Ariya a na olo boleq atsiqa e osorbej. Agi e deqa anjam truquyala endego neŋgreŋyonum. 4 Ariya niŋgi anjam endi sisiyosib endegsib qalieqab, Kristus aqa anjam nami ulitesoqnej qaji di aqa utru e geregere poibeqnu. 5 Qotei na aqa uli anjam di tamo uŋgasari nami soqneb qaji naŋgi minjrosaioqnej. Ariya bini a na aqa Mondor aqa siŋgila na anjam di babtoqnsiq aqa anjam maro tamo naŋgi ti aqa medabu o qaji tamo naŋgi ti minjreqnu. 6 Anjam di aqa utru agiende. Niŋgi sawa bei bei qaji tamo uŋgasari niŋgi Kristus aqa anjam bole qusib nuŋgo areqaloq di ateb deqa Qotei na niŋgi ti iga ti turtgosiqa sawa qujaiq di atej. Deqa iga kalil tamo qujaionum. Deqa iga ti niŋgi ti kalil iŋgi bole bole Qotei a nami iga Kristus Yesus aqa baŋ na egwajqa marej qaji di oqom. 7 Qotei na e Kristus aqa anjam bole di marsiy laqajqa deqa e wau tamo atej. A e qa are boleiyosiq deqa e wau di yqajqa siŋgila ebej. 8 Qotei aqa tamo uŋgasari kalil naŋgi na e tulaŋ buŋbejunub. Ariya Qotei a e qa are boleiyosiq wau ebej. E na sawa bei bei qaji tamo naŋgi Kristus aqa anjam bole minjre minjre laqajqa deqa osiq e wau ebej. Anjam bole di aqa utru agiende. Kristus na iga laŋ qaji iŋgi bole bole egeqnu. Iŋgi bole bole di aqa utru iga na ubtsim marqa keresai. 9 Niŋgi qalie, Qotei a na iŋgi iŋgi kalil ateleŋej unub. Ariya kumbra bole kalil a na iga egwajqa nami aqa areqaloq di soqnej qaji di a ulitosiq soqnej. Ariya bini e na aqa areqalo di olo boleq atqajqa deqa marsiq e wau ebej. 10 Nami a na aqa areqalo di ulitesoqnej. Ariya bini aqa segi tamo uŋgasari naŋgi are qujaitosib unub kumbra dena a na aqa segi areqalo bole ti aqa powo ti boleq atej. Yim laŋ aŋgro siŋgila kokba ti mondor laŋ goge di unub qaji naŋgi ti Qotei aqa areqalo di unsib qalieqajqa deqa. 11 Tulaŋ nami Qotei a kumbra bole di iga egwajqa are qalej. Ariya bini a gago Tamo Koba Kristus Yesus aqa wau na kumbra di agi iga egej. 12 Iga Kristus qa gago areqalo siŋgilateqnum deqa iga iŋgi bei qa ulaosaieqnum. Iga bole qalieonum, iga Qotei aqa ulatamuq di brantqajqa gam agi Kristus a segi qujai. 13 Deqa e niŋgi endegsi merŋgwai. E niŋgi aqaryaiŋgoqnsim dena e gulube koba eqnum niŋgi deqa are koba qalaib. Niŋgi are koba qalqab di niŋgi uloŋqab. Deqa niŋgi ijo gulube deqa areboleboleiŋgem. Di kiyaqa? Ijo gulube dena niŋgi aqaryaiŋgimqa niŋgi Qotei ombla so bole gaigai sqab.

Qotei na Efesus naŋgi siŋgilatnjrqajqa deqa Pol a pailyeqnu

14 E Abu Qotei aqa kumbra deqa are qaloqnsim deqa e siŋga pulutoqnsim a biŋiyeqnum. 15 A tamo kalil laŋ ti mandam ti di unub qaji naŋgo Abu sosiq deqa a naŋgo ñam breiyetnjreqnu. 16 Deqa e siŋga pulutoqnsim niŋgi qa endegsi Qotei pailyeqnum, “O Abu, ni iŋgi bole bole Efesus naŋgi gereiyetnjrem deqa ni na ino Mondor naŋgo are miligiq di atim soqnim dena naŋgi tulaŋ siŋgilaqab. 17 Osib naŋgi Kristus qa naŋgo areqalo siŋgilatqab dena Kristus a naŋgo are miligiq di sqas. O Abu, ni na Efesus naŋgi siŋgilatnjrimqa qalaqalaiyo kumbra naŋgo are miligiq di tulaŋ siŋgilatib soqnim naŋgi siŋgila na tigelesqab. Mandam na ŋam jirim ojesonaqa ŋam a siŋgila na tigelejunu dego kere.” O was qu, e niŋgi qa degsim Qotei pailyeqnum. 18 Deqa niŋgi ti Qotei aqa segi tamo uŋgasari kalil naŋgi ti siŋgila osib Kristus aqa qalaqalaiyo kumbra deqa qalieosib soqniye. Aqa qalaqalaiyo kumbra di tulaŋ kobaquja. A tulaŋ olekoba. A tulaŋ goge koba. A tulaŋ guma koba. Od, Kristus aqa qalaqalaiyo kumbra dena powo ti qalie ti kalil tulaŋ buŋnjrejunu. Deqa niŋgi aqa qalaqalaiyo kumbra deqa geregere qalieosib soqniye. Soqnim iŋgi bole bole kalil Qotei aqaq di unu qaji di dego nuŋgoq di sqas.

20 Qotei aqa siŋgila a gago are miligiq di waueqnu. Aqa siŋgila dena gago areqalo kalil tulaŋ buŋyejunu. Gago pail kalil dego aqa siŋgila de ti keresai. A na tulaŋ buŋyejunu. 21 Deqa Qotei aqa segi tamo uŋgasari kalil naŋgi Kristus Yesus aqa ñam na Qotei aqa ñam bati gaigai soqtoqnsib gilsi gilsib diŋo bati itqab. Bole.